4 di mei 2010 / 1-0510
 

Lealtat ehemplar
Candita Geertruida 40 aña den servisio di FEKOSKAN

Willemstad - Djasabra 1 di mei 2010 tabata un dia memorabel pa Federashon di Kooperativanan di Spar i Krédito Antiano (FEKOSKAN) pasobra Candita Geertruida ku ta enkargá ku limpiesa di ofisina di e organisashon, a kumpli 40 aña den servisio.
Sra. Geertruida di 82 aña di edat a konta ku ta dia el a bin hasi un fiansa na Credit Union el a topa ku pader Amado Römer (qepd) i Joyce da Costa Gomes kendenan tabata enkargá ku fiansa na miembro. Nan a puntr’é si e ke bin traha na e kooperativa i asina ei el a kuminsá traha. Tabata deseo di pader Römer pa e mucha muhénan ku ta bin di aleu i ku mester pasa ei dilanti pa bai nan trabou, tin un lugá kaminda nan por a sosegá promé nan bai trabou i sra. Geertruida tabata enkargá su mes pa sòru pa tur mainta tin chukulati kla pa esnan ku ta deseá di sinta ei un ratu.
Durante di e 40 añanan el a wak tur e direktivanan i empleadonan ku tabata na FEKOSKAN. ‘Un bon eksperensia i mi stima tur’, asina sra. Geertruida a bisa durante di e selebrashon ameno organisá na su honor djamars mainta na Kas Kooperativa Amado Römer..

Direktor di FEKOSAN Stephen Mambi a gradisí sra. Geertruida pa su añanan di trabou i espesialmente pa e lealtat ku e tin na e organisashon i su koleganan.
Pa presidente di FEKOSKAN Wilfrido de Lima ta importante pa rekonosé e nifikashon di señora Geertruida den FEKOSKAN. E sa mas ku nos di desaroyo di último 4 dékada, algu históriko, segun sr. de Lima.

Riba e potrètnan ( © BISInc) por mira:
1 i 2 momentunan di selebrashon di 40 aña den servisio di FEKOSKAN di Candita Geertruida, huntu ku su yu, koleganan gerensia i miembronan di direktiva di FEKOSKAN
3. Candita Geertruida dilanti di e palu di kashu di kashipete ku e mes a planta na 1992 den kura di Kas Kooperativa Amado Römer.